काठमाण्डौ – भाेलिदेखि सरकारले ६० देखि ६४ वर्ष उमेर समूहका व्यक्तिलाई चिनियाँ भेरोसेलको पहिलो मात्रा खाेप दिने भएकाे छ । पहिलाे चरणमा काठमाण्डौ महानगरपालिकासहित काठमाण्डौका विभिन्न ११ पालिकामा खाेप लगाइने जनाइएकाे छ ।
काठमाण्डौ महानगरपालिकाले सूचना निकालेर भोलिदेखि २९ गतेसम्म भेरोसेल खोप लगाइने जानकारी गराएको छ । महानगरपालिकाका सहरी स्वास्थ्य विभागका प्रमुख हरिबहादुर कुँवरका अनुसार भेरोसेलको पहिलो खोप लगाउनका लागि विभिन्न ३२ वटा वडामा ३२ केन्द्र तोकिएका छन् ।
स्वास्थ्य तथा जनसङ्ख्या मन्त्रालयको गएको १८ गतेको निर्णय र जिल्ला खोप तथा अनुगमन समिति काठमाण्डौको २३ गते आइतवारको निर्णयअनुसार कोरना भाइरसविरुद्धको भेरोसेलको पहिलो डोज लगाउन लागिएको हो ।
काठमाण्डौका प्रमुख जनस्वास्थ्य प्रशासक बद्रीबहादुर खड्काका अनुसार भोलिदेखि काठमाण्डौ महानगरपालिका, कीर्तिपुर नगरपालिका, चन्द्रागिरी नगरपालिका, नागार्जुन नगरपालिका, तारकेश्वर नगरपालिका, टोखा नगरपालिका, दक्षिणकाली नगरपालिका, बूढानीलकण्ठ नगरपालिका, गोकर्णेश्वर नगरपालिका, शंकरापुर नगरपालिका र कागेश्वरी मनोहरा नगरपालिकामा भेरोसेलको पहिलो मात्रा ६० देखि ६४ वर्ष उमेरका नागरिकलाई लगाउन लागिएको हो ।
खोप लगाउन जाँदा उमेर खुल्ने परिचयपत्र, नेपाली नागरिकताको प्रमाणपत्र वा सम्बन्धित वडा कार्यालयको सिफारिस लैजानु पर्दछ । चीनले कोरोना विरुद्धको भेरोसेलको १० लाख डोज अनुदानमा उपलब्ध गराएपछि ६० देखि ६४ वर्ष उमेरका नागरिकलाई यो खोप दिन लागिएको हो ।
चीनले यसअघि नेपाललाई ८ लाख डोज खोप अनुदानमा दिएको थियो ।
