रविन्द्र कंडेल
गोरखा संसार
बैशाख ११, गोरखा
गोरखा जिल्लाको पालुङ्टार नगरपालिका वडा नं. ४ स्थित अमर ज्योति मा.वि.मा काम गर्दै आएका ३२ जना मजदुर कैलालीको भजनिया नगरपालिका स्थित आफ्नो गृहपालिका भजनिया पुुगेका छन् । तर उनीहरु घर जानुभन्दा पहिले क्वारेन्टिनमा बसिरहेका छन ।
गोरखाको पालुङ्टार नगरपालिकाबाट ३२ जना मजदुर वडा नं. ७ को च्याङ्ली नाकाबाट ८ गते बाहिरिन लागेको थाहा पाएपछि नगरपालिकाका नगर प्रमुख, उपप्रमुख एवं वडा नं. ७ का वडाध्यक्ष सहितले सहयोग गरी गाडी चढाएर नारायणगढसम्म पठाइएको थियो । उनीहरु हिँडेरै भने पनि घर पुग्नको लागि हिंडेका थिए । 
तर पछि नगरपालिकाले नारायणगढसम्म पुग्ने व्यवस्था मिलाइदिएपछि नारायणगढबाट ट्रक चढेर भालुवाङसम्म र भालुबाङबाट ट्याक्टर मा चढेर बाँकेसम्म अनि बाँकेबाट भजनियासम्म अर्को एक गाडीमा गरी आफ्नो स्थानसम्म पुगेको एक मजदुरले गोरखा संसार मिडिया प्रा.लि.लाई जानकारी दिएका छन् । तर उनीहरु घर पुग्दासम्म सबैले सहयोग गरेकाले आफ्नो कुनै खर्ज भने नभएको उनले बताएका छन् ।
उनीहरुलाई अहिले भजनियाकै विद्यालय सहित विभिन्न स्थानहरुमा क्वारेन्टिनमा राखिएको छ ।
घर जाने टोलीमा १० महिला र २२ पुरुष गरी ३२ जना रहेका छन् ।
