पालुङटार नगरपालिकाकाे तेस्रो चौमासिक सार्वजनिक सुनुवाई कार्यक्रम सम्पन्न

पालुङटार नगरपालिकाले आर्थिक वर्ष २०८९/०८० को तेस्रो चौमासिक सार्वजनिक सुनुवाई कार्यक्रम सम्पन्न गरेको छ । बुधबार पालुङटार नगरपालिका वडा नं. ५ को वनदेवी मन्दीर परिसरमा सम्पन्न भएको कार्यक्रममा सहभागिहरुले उठाएका जिज्ञासाको जवाफ दिँदै पालुङटार नगरपालिकाको नगर प्रमुख विवस चिन्तनले संमृद्ध पालुङटार निर्माण गर्न आफु सबै संग हातेमालो गरेर अघि बढ्न तयार रहेको बताउनुभएको छ । उहाँले आँपपिपल अस्पताललाई ५० सैयाको अस्पतालको रुपमा स्तरोन्नती गरेर बिशिष्ठ सेवा प्रदान गर्ने प्रक्रियामा लागि परेको बताउनुभएको छ । बाँझा रहेका नगरपालिका भित्रका उर्भर जमिनलाई सिंचाईको व्यवस्था गरेर उर्बरा योग्य जमिन बनाउने नगरपालिकाको लक्षरहेको नगर प्रमुख चिन्तनको भनाइ रहेको छ । जनजाति माहासंघको कार्यक्रमका लागि रकम नछुट्याएको प्रश्नको जवाफ दिँदै नगर प्रमुख चिन्तनले मेला र जात्राका लागि भन्दा पनि जनजातिहरुका लागि आयआर्जन हुने खालका कामका लागि आफुले रकम बिनियोजन गर्ने भन्दै त्यसका लागि प्रपोजल पेश गर्न अपिल गर्नुभएको छ ।
कार्यक्रममा पालुङटार नगरपालिकाकी उप–प्रमुख बन्दना पाण्डेले सार्बजनिक सुनुवाई कार्यक्रम मार्फत् नगरपालिकाले स्थानिय जनताहरुको गुनासो सुन्ने र जनताहरुले दिएको सुझाबको आधारमा आफुहरु अघि बढ्ने प्रतिबद्धता व्यक्त गर्नुभएको छ । सोहि अवसरमा उहाँले आफुहरु यी र यस्तै कार्यक्रम मार्फत् जनताको गुनासो सुन्न र जनताको हरेक सुख दुःखमा साथ दिनका लागि निर्वाचित भएको बताउनु भयो । उप–प्रमुख पाण्डेले न्यायिक समितिको काम जनतालाई न्याय दिने भन्दा पनि मेलमिलाप गराउने भएको भन्दै अहिले सम्मका धेरै उजुरीहरु मेलमिलापको माध्यमबाट समस्या समाधान गरिएको बताउनुभएको छ ।
पालुङटार नगरपालिका वडा नं. ५ का वडा अध्यक्ष दिपक पाण्डेको अध्यक्षतामा सम्पन्न भएको कार्यक्रममा नगरपालिका प्रमुख प्रशासकिय अधिकृत गौतम भण्डारी, वडा नं. ३ का वडा अध्यक्ष रविद्र अधिकारी, वडा नं. का ४ वडा अध्यक्ष मान बहादुर पौडेल, वडा नं. ६ का वडा अध्यक्ष चेत बहादुर गुरुङ, वडा नं.७ का वडा अध्यक्ष अर्जुन बहादुर कुमाल, ईलाका प्रहरी कार्यालय ठाँटीपोखरीका प्रहरी निरीक्षक सुरेन्द्र तामाङ, नगरपालिकाका शाखा प्रमुखहरुले सहभागिहरुबाट उठेका जिज्ञाशाहरुको जवाफ दिनुभएको थियो ।
कार्यक्रममा नगरपालिकामा क्रियासिल राजनीतिक दलहरु नेपाली कांग्रेस पालुङटारका नगर सभापति बिमल ढकाल, नेकपा माओवादी केन्द्रको जिल्ला समन्वय समिति सदस्य जोनी सुनार, नेकपा समाजवादी पार्टीको तर्फबाट डिल बहादुर खत्री, नेपाल समाजवादी पार्टीको केन्द्रीय सदस्यनारायणी अधिकारी लगायतले मन्तव्य व्यक्त गर्नुभएको थियो ।
कार्यक्रममा सहभागिहरु मध्येका अधिकांश सहभागिहरुले कृषि तथा पशु पालनका लागि अनुदानको व्यवस्था मिलाउन, बर्षायाममा अबरुद्ध भएका र सडकमा परेका खाडलहरु पुर्न, पालुङटारमा बन्द अवस्थामा रहेको बिमास्थल सञ्चालनका लागि पहल गर्न, ठाउँ ठाउँमा जेष्ठ नागरिक आश्रय स्थल बनाउन, दोहोरो कर प्रणालीको अन्त्य गर्न, उपभोक्ता समिति मार्फत गरिएका बिकास निर्माणका काममा स्थानिय स्रोत र साधनको प्रयोगको व्यवस्था मिलाउन, सामुदायिक विद्यालयको शैक्षिक अवस्था सुधार गर्न, महङ्घी नियन्त्रण गर्न, नगरपालिका भित्रका सबै ठाउँमा चोबिसै घण्टा एम्बुलेन्स सेवा उपलब्ध गराउनु पर्ने जस्ता सुझाबहरु दिएका छन् ।