काठमाडौं, १२ भदौ । नेपाल शिक्षक महासंघले आज ललितपुरको च्यासलस्थित नेकपा (एमाले) केन्द्रीय कार्यालयमा दुई घण्टा धर्ना दिएको छ ।
धर्नापछि महासंघको टोलीले पार्टीका महासचिव शंकर पोखरेललाई ज्ञापनपत्र समेत बुझाएको छ ।
यसअघि बुधबार महासंघले नेपाली कांग्रेसको सानेपास्थित पार्टी कार्यालयमा धर्ना दिएको थियो भने शुक्रबार नेकपा (माओवादी केन्द्र)को पेरिसडाँडास्थित कार्यालयमा धर्ना दिने कार्यक्रम तय गरिएको छ ।
महासंघले हाल संसदमा दर्ता भएको विद्यालय शिक्षा विधेयकमा विगतका सहमति कार्यान्वयन नगरेको भन्दै आन्दोलन सुरु गरेको हो ।
