दशैं आउन अब झन्डै २ महिना मात्रै बाँकी रहँदा पूर्वी नेपाल जाने मुख्य लाइफलाइन मानिने बीपी राजमार्गको अवस्था अहिले अत्यन्तै नाजुक बनेको छ । वर्षासँगै पहिरोले बाटो बिग्रिएको छ भने कतिपय स्थानमा सवारी चल्नसमेत कठिन बनेको छ ।
यातायात अवरुद्ध हुँदा यात्रुहरू सास्ती बेहोर्न बाध्य भएका छन्। खासगरी चाडपर्वमा घर फर्किनेहरूका लागि यो अवस्था चिन्ताजनक बनेको छ ।
हाल राजमार्गको पुनर्निर्माण कार्य जारी छ । जापान सरकारले पुनः नेपाललाई सहयोग गर्दै राजमार्गको स्तरोन्नति र मर्मतमा सहकार्य गर्ने प्रतिबद्धता जनाएको छ ।
बीपी राजमार्गले राजधानी काठमाडौंलाई तराईका विभिन्न जिल्ला सिन्धुली, रामेछाप, उदयपुर हुँदै सर्लाही, महोत्तरी, सिरहा र सप्तरीजस्ता जिल्लासँग जोड्ने भएकाले यसको अवस्था सुधार गर्नु अपरिहार्य बनेको छ ।
जनताको दैनिक आवागमन र चाडपर्वको भीडलाई ध्यानमा राख्दै सम्बन्धित निकायले यथाशीघ्र काम सम्पन्न गर्नुपर्ने आवश्यकता स्थानीयले औँल्याएका छन् ।
