शंकरराज नहर्की । तनहुँ ७ भदौ २०८१ शुक्रवार । तनहुँको आँबुखैरेनी गाउँपालिका वडा नं १ ऐनापहरा नजिकै आज बिहान ११.३० बजे को समयमा मर्स्याङ्दी नदीमा बस खस्दा मृत्यु हुनेको सङ्ख्या २७ पुगेको छ ।
बसमा सवार ४३ जनामध्ये २७ जनाको मृत्यु भएको छ। मृत्यू हुनेमा १६ जना महिला र ११ जना पुरुष रहेको आँबुखैरेनी अस्पतालका प्रमुख डाक्टर डि वि क्षेत्रीले बताए । सबै लाशहरू पोखरा पठाएर पोष्टमार्टम पछि आफन्तहरुको जिम्मा लगाइने घटनास्थल तथा आँबुखैरेनी अस्पताल पुगेका तनहुँका प्रमुख जिल्ला अधिकारी जनार्दन गौतमले बताए । प्रजिअ गौतमले भने – ‘यो अत्यान्त दुःखद घटना घट्यो , हामी सबै अत्यान्तै दुःखद छौँ । ‘
उता भरतपुर अस्पतालमा उपचारको क्रममा एक जना, घटनास्थल र आँबुखैरेनी अस्पतालमा उपचारको क्रममा मृत्यु हुँदा उक्त संख्या पुगेको हो ।
यस्तै घटनामा १६ जना घाइते भएका छन् । पोखराबाट काठमाडौँ आउदै गरेको भारतीय नम्बर प्लेटको युपी ५३ एफटी ७६२३ नम्बरको बस मस्र्याङदी नदिमा खस्दा दुर्घटना भएको हो । गम्भीर घाइते भएका मध्ये १२ जनालाई सेनाको हेलिकप्टरबाट काठमाडौं पठाइएको छ भने अन्यको आँबुखैरेनी अस्पतालमा उपचार भइरहेको प्रहरीले जनाएको छ । उद्धार कार्यमा नेपाल प्रहरी,शसस्त्र प्रहरी र नेपाली सेना लगायतको सहभागिता रहेको थियो ।
