गोरखा ,१३ साउन । गोरखामा गएराती पहिरोमा परी ५ जना बेपत्ता भएका छन् । उत्तरी गोरखाको धार्चे गाउँपालिका–५, सिड्लास्थित रेसे गाउँमा पहिरोले एक घर र गोठ बगाएको हो । बेपत्ता भएकाहरुको पहिचान खुल्न बाँकी रहेको गाउँपालिकाकी उपाध्यक्ष सुनिला गुरुङ्गले जानकारी दिनुभयो । पहिरोमा परी दुई जना घाइते भएका छन् ।
बेपत्ता व्यक्तिहरुको खोजी भइरहेको गाउँपालिकाकी उपाध्यक्ष गुरुङ्गले बताउनुभयोे । पहिरोमा परि स्थानीय छमबहादुर गुरुङ्ग र मीनबहादुर गुरुङ्ग घाइते भएको उहाँले बताउनुभयो । घाइतेलाई हेलिकप्टरमार्फत थप उपचारका लागि पठाउने प्रयास भइरहेको उपाध्यक्ष गुरुङ्गले जानकारी दिनुभयो ।
उद्धारका लागि घटनास्थलतर्फ प्रहरीको टोली पठाइसकिएको जिल्ला प्रहरी कार्यालय गोरखाका सूचना अधिकारी एवं प्रहरी नायव उपरीक्षक (डिएसपी) रमेश कुमार श्रेष्ठले जानकारी दिनुभयो ।
‘‘गएराती करिब ३ बजेको समयमा पहिरोले एउटा घर र गोठ बगाएको जानकारी आएको छ, उहाँले भन्नुभयो, ‘‘हाम्रो टोली घटनास्थलतर्फ गइसकेको छ, थप जानकारी प्राप्त हुन बाँकी छ ।
