कर वृद्धिको विरोधमा अनशनकारीले कार्यालयको सीसा फुटाए

कर वृद्धिको विरोधमा अनशनकारीले कार्यालयको सीसा फुटाए, नगरपालिकाबाट वार्ताको लागि अव्हान चितवनको रत्ननगर नगरपालिकाले गरेको कर वृद्धिको विरोधमा विभिन्न सात दलहरुले सुरु गरेको रिले अनशन दोस्रो दिन पनि जारी रहेको छ । नेपाली कांग्रेंसलगायत रत्ननगर नगरपालिकामा क्रियाशील विभिन्न सात राजनीतिक दलले संयुक्त रुपमा कर वृद्धिलगायतको ११ माग राखेर रिले अनशन बसेका हुन् । रत्ननगर नगरपलिकाले १ हजार प्रतिशतसम्म कर वृद्धि गरेको भन्दै विरोध हुँदै आएको छ । चरणबद्ध आन्दोलनको अन्य विभिन्न कार्यक्रम गर्दा समेत नगरपालिका नेतृत्वले आफूहरुको माग सुनुवाइ नगरेको भन्दै रिले अनसनमा बस्नु परेको नेपाली कांग्रेस रत्ननगर नगर समितिका सभापति रुपनराज घिमिरेले बताए । उनीहरुले अनसनसँगै राजस्व शाखा समेत बन्द गराएका छन् ।आन्दोलनकारीहरुले आज राजश्व शाखाको सिसा समेत फुटाएका छन् भने कर तिर्न आएका सेवाग्राहीको रसिद समेत च्यातिदिएका छन् । कर बृद्धि विरुद्धको आन्दोलनमा क्षेत्रीय होटल व्यवसायी संघ नेपाल चितवनले एक्यवद्धता जनाएको छ । करको दरमा बृद्धि नभएको तर जग्गाको मुल्याकंन बढेकोले करको रकम बढेकोे रत्ननगर नगरपालिकाका प्रमुख नारायण वनले बताए । नगरपालिकाले आन्दोलनरत पक्षहरुसँग वार्ता र सम्वाद गरेर समस्या समाधान गर्न तयार रहेको जनाउदै आज बेलुका वार्ताको लागि आवहन समेत गरेको छ । नगरपालिकाले प्रमुख प्रशासकिय अधिकृतको नेतृत्वमा वार्ता समिती गठन गरेको छ । आन्दोलनरत पक्षले भने कर्मचारीहरुसँग वार्तामा नबस्ने भन्दै नगर प्रमुख कै नेतृत्वमा वार्ता समिती गठन हुनुपर्ने माग गरेका छन् ।

Back to top button
Close