गोरखा संसार
२७ भाद्र, गोरखा ।
बिश्व महामारीको रुपमा फैलिएको कोभिड १९ का कारण ज्यान गुमाएकाको परिवारलाई गोरखा समाज हङकङले सहयोग गरेको छ ।
गोरखाको पालुङ्टार नगरपालिकाको वडा नं. ७ का ४० बर्षीय पुरुषको गत साउन मा ज्यान गुमाएकाको परिवारलाई आज एक कार्यक्रमका बीच सहयोग रकम हस्तान्तरण गरिएको हो ।
गोरखा समाज हङकङबाट प्राप्त रकम पिडित परिवार समक्ष पुर्याउन गोरखा इन्टरनेशनल ट्राभल्स प्रा.लि. ले सहयोग गरेको हो ।
गोरखा इन्टरनेशनलका प्रोप्राइटर शुशील पन्तले आफ्नो गाउँकै व्यक्ति कोरोनाबाट ज्यान गएपछि सामाजिक उत्तरदायित्व अन्तर्गत आफूले सहयोगको अपिल गरेसँगै समाजले आर्थिक सहयोग संकलन गरी पठाएको र उक्त रकम आफूले घरपरिवारसम्म पुर्याएको बताउनुभयो ।
गोरखा इन्टरनेशनलका प्रोप्राइटर पन्त बिगत लामो समयदेखि निरन्तर समाजसेवामा लागिरहनुभएको छ ।
समाजबाट संकलित ४० हजार रकम मृतकका परिवारलाई आज हस्तान्तरण गरिएको हो । समाजका सचिव पालुुङ्टार नगरपालिका वडा नं. ६ निवासी सागर (काजीमान) गुरुङमार्फत उक्त रकम संकलन गरिएको थियो । हस्तान्तरण कार्यक्रममा नगरपालिकाका नगरप्रमुख ई. दिपकबाबु कंडेल, वडा नं. ७ का वडाध्यक्ष बसन्त कुमार श्रेष्ठ, गोरखा संसार मिडिया प्रा.लि.का सञ्चालक रविन्द्र कंडेल लगायत स्थानीय बुद्धिजीवी तथा समाजसेवीहरुको समेत उपस्थिति रहेको थियो ।
हस्तान्तरण कार्यक्रममा नगरप्रमुख कंडेल तथा वडाध्यक्ष श्रेष्ठले सहयोगी मनहरुप्रति धन्यवाद ज्ञापन समेत प्रदान गर्नुभएको थियो ।
मृतकका श्रीमतीसहित १ छाेरा र १ छाेरी छन् ।
