गाेरखा संसार,
११ जेठ
बाँके – बाँकेको नरैनापुरमा नेपाली सेना परिचालन गरिने भएको छ ।
बाँके जिल्ला सुरक्षा समितिको आज (आईतबार)को बैठकले सेना परिचालन गर्ने निर्णय गरेको हो ।
कोरोना अति प्रभावित नरैनापुर गाउँपालिका अध्यक्ष इस्तियाक अहमद शाहका अनुसार अब नरैनापुरा नेपाली सेनाले कोरोना संक्रमण नियन्त्रणका लागि काम गर्ने बताए ।
सेनाले नरैनापुरका क्वारिन्टीन, शिल गरिएको क्षेत्रलाई अनुुगमन, लकडाउन प्रभावित बनाउन, शान्ति सुरक्षा र स्वास्थ्यकर्मीलाई सहज बनाउन सेनाले काम गर्ने छ । पछिल्लो समय कोरोना संक्रमितलाई आईसोलेसनमा लैजानेक्रममा अवरोध हुने र भगाउने कार्य हुन थालेपछि सेना परिचालन गर्ने निर्णय बैठकले गरेको हो ।
बैठकले नरैनापुरमा विशेषज्ञ चिकित्सक सहित थप स्वास्थ्यकर्मी परिचालन गर्ने निर्णय समेत गरेको छ । कोरोना संक्रमण फैलिन नदिन अर्को सूचना जारी नभएसम्मका लागि निषेधित क्षेत्र कायम गरिएको छ ।
यसअघि गाउँपालिकाले कोरोना संक्रमणको स्थिति नियन्त्रणभन्दा बाहिर जाने अवस्था देखिएको भन्दै चिकित्सक टोलीसहित सुरक्षाकर्मीको संख्या बढाउन माग गरेको थियो ।
संक्रमित र निजका परिवारलाई केही व्यक्तिहरूले उक्साउने र कोरोना भाइरसबारे भ्रम सिर्जना गरी सुरक्षाकर्मी, स्वास्थ्यकर्मी र कर्मचारीलाई असहयोग गर्ने, मनोबल कमजोर पार्ने र संक्रमित भगाउने काम भइरहेको भन्दै गाउँपालिकाले प्रशासन गुहारेको थियो ।
बाँकेको नरैनापुर गाउँपालिकामा मात्रै हालसम्म ११४ जनामा संक्रमण पुष्टि भइसकेको छ । एक जना युवकको संक्रमणकै कारण मृत्यु भएको छ । बाँकेमा मात्रै संक्रमितको संख्या १४२ रहेको छ । यो नेपालमा सबै भन्दा बढी संक्रमित भएको जिल्ला हो ।
