टेस्ट क्रिकेटमा ६ हजार रन पूरा गरे विराट कोहलीले

भारतीय क्रिकेट टिमका कप्तान विराट कोहलीले टेस्ट क्रिकेटमा ६ हजार रन पूरा गरेका छन् ।

इंग्ल्याण्डविरुद्ध चौथो टेस्टमा आज ब्याटिङ गरेका कोहलीले ६ हजार रन पूरा गरेका हुन् । जारी श्रृंखलामा उत्कृष्ट फर्ममा रहेका कोहली यो टेस्ट सुरु हुनुपूर्व ६ रनले पछि थिए । चौथो टेस्टको पहिलो पारीमा ४६ रन बनाउँदै उनी आउट भइसकेका छन् ।

सन् २०१० मा जिम्बाब्वेविरुद्ध डेब्यू गरेका कोहलीले ११९औं पारिमा ६ हजार रन पूरा गरेका हुन् । भारतका सुनिल गावस्करले ११७ पारीमै ६ हजार रन पूरा गरेका थिए ।

यसैगरी सचिन  तेन्दुलकरले १२० तथा वीरन्द्र सेवागले १२१ औं पारिमा यो आंकडा पार गरेका थिए ।

टेस्टमा सबैभन्दा कम पारिमा ६ हजार रन बनाउने कीर्तिमान भने अष्ट्रेलियन महान ब्याट्सम्यान डन ब्राडम्यानको छ । उनले जम्मा ६८ पारीमा यो उपलब्धि हासिल गरेका थिए । उनी पछि अहिलेसम्म कसैले पनि १०० पारिभित्र ६ हजार रन बनाएका छैनन् ।

Back to top button