यौनजन्य हिंसा बढ्दा समेत सरकारले यसको नियन्त्रण गर्न नसकेको एम्नेस्टी इन्टरनेशनल नेपालले चिन्ता

धरानः समाजमा दिनप्रतिदिन महिला हिंसा तथा यौनजन्य हिंसा बढ्दा समेत सरकारले यसको नियन्त्रण गर्न नसकेको एम्नेस्टी इन्टरनेशनल नेपालले चिन्ता जनाएको छ ।
२८ औं साधारणसभाको पूर्व सन्ध्यामा धरानमा आयोजित पत्रकार सम्मेलनमा उसले यस्तो चिन्ता व्यक्त गरेको हो । उसले एसिड आक्रमण हुँदा साथै एसिडजन्य विक्रीवितरणमा रोक्न आदेश भइसक्दा पनि खुलेआम बिक्रीवितरण हुनु दुःखद् भनेको छ । कार्तिक २२ र २३ गते धरानमा देशभरका एम्नेस्टी समूहका १३० प्रनिनिधि जम्मा हुने कार्यक्रम छ । कार्यक्रममा बोर्डका सदस्य, पुनरावेदन समितिका सदस्य, पूर्व अध्यक्ष, कर्मचारी, स्वयंसेवक, पर्यवेक्षक साथै अन्तर्राष्ट्रिय बोर्ड र अभियानका प्रतिनिधिहरूको सहभागिता रहने कार्यक्रम छ ।

धरानको होटल गजुर प्यालेसमा हुने साधारणसभा दिउँसो २ बजे राष्ट्रिय मानवअधिकार आयोगका अध्यक्ष अनुपराज शर्माले उद्घाटन गर्ने कार्यक्रम रहेको अध्यक्ष निराजन थपलियाले जानकारी दिए । साधारणसभाका अवसरमा एसिड आक्रमणबारे सचेतनाका लागि नाटक समेत प्रस्तुत हुने कार्यक्रम रहेको उनले जानकारी दिए । कार्यक्रममा प्रतिनिधिहरूले गत वर्षको आफ्नो मानवअधिकारसम्बन्धी कार्यहरुको प्रभावका बारेमा चिन्तन र छलफल गर्ने कार्यक्रम रहेको उनले बताए । साधारणसभाका क्रममा जलवायु परिवर्तका विरुद्ध, दण्डहिनताको विरुद्ध, श्रमिक अधिकारबारे, महिला हिंसा न्यूनीकरणबारे निरन्तर दबाब दिने विषयमा बहस हुने उनले बताए ।
‘बन्दसत्रमा संस्थाको आर्थिक प्रतिवेदनलाई छलफल गरी अनुमोदन गर्ने तथा केही मानवअधिकारसम्बन्धी प्रस्तावमाथि पनि छलफल चलाइ पारित गरिनेछ’, वितरित विज्ञप्तिमा भनिएको छ ।
‘नेपालमा गरिहो रुपमा जरा गाडेर रहेको दण्डहीनतालाई अन्त्य गर्ने सवालमा आफ्ना गतिविधिसम्बन्धी परिदृश्यलाई साटासाट गर्दै अन्यालाई व्यक्तिगतरुपमा लिन र त्यसविरुद्ध लाग्न प्रोत्साहित गर्नेछ ।’ विज्ञप्तिमा भनिएको छ ।